Les mots surlignés font l'objet d'une note
1Reçue à Grenoble, le 02 mars 1573.
2Mon cousin, je suis asseuré que sy vous pouvez myeulx le ferez très volluntiers vous
3emploiant avec tout le soing et industrye possible pour preparer ce que vous est necessaire
4et dresser votre armée, ce que ne pouvez faulte dargent advancer comme desireriez, actendu le
5chemin quil vous fault faire avant que recepvoir les deniers que je vous ay permis lever
6en votre gouvernement. Vous aurez veu par ma dernière comme jay requis mon oncle, le
7duc de Savoye, vous secourir de quelque quantité de pouldres à canon et boulletz, ignorant
8quil vous eust accordée la traicte que me mandez. Je vous ay aussi envoyé une lettre pour
9la Seigneurie de Gennes affin daccelerer la levée des Corces quilz ont promyse et mande
10aux sieurs de Carces, de Gordes, et Mandelot quilz me feront service très agreable se
11rendre près de vous pour my faire service. Je mande presentement aux deux premiers
12quilz vous envoyent chacun les quatre compagnyes que vous leur avez demandées, voullans
13quil ne vous soit rien retranché de ce dont vous avez faict estat. Jentendz pareillement
14que vous puissez faire battre le tabourin et lever gens tant en mes païs de Provence
15et Daulphiné. Comme par tout ailleurs pour ceste occasion, considère que toutes choses
16sont esdits païs en estat si trancquille quil ne fault craindre quil en arrive inconvenience
17voullans qu’un chacun deulx ayt telle correspondance avecques vous pource quy concerne
18mon service quy ne vous soit riens reffuzé de ce que vous aurez besoing comme je
19leur escriptz. Mon Cousin, je vous asseure à ce commencement d’année me retrouver
20en telle necessité d’argent quil m’est du tout impossible pourveoir au payement des
21Corces et de la gendarmerie quy est pardela comme vous desirez et congnois quil
22est necessaire ; toutesfois, lon y fera le myeulx que lon pourra, vous priant ce
23pendant vous ayder le myeulx que vous pourrez, ayant fondé toute mon esperance
24pour mes affaires de pardela sur votre industrye et saige conduicte. Je prye Dieu,
25mon cousin, vous avoir en sa garde. Escript à Paris, le IIIIe febvrier 1573. Ainsi signé
26Charles et plus bas de Neufville et audessus est escript : « A Mon cousin le sieur de
27Dampville marechal de France gouverneur et mon lieutenant general en Languedoc »